Mar 16 | AEY | STEP | Pasowa Sab Jec cuha deel hedocob Maria Makdaladecca, Maria Jems anagca, Salomica age Jisas dewegna mool dedeman meme joudoqaga bili belein.

Mark 16

Jisas ceseli cajen

(Matju 28.1-8; Luk 24.1-12; Jon 20.1-10)

1 Pasowa Sab Jec cuha deel hedocob Maria Makdaladecca, Maria Jems anagca, Salomica age Jisas dewegna mool dedeman meme joudoqaga bili belein. 2 Cuha deelna qasil wele bahic age walag dadanen qalqal hatinna belein. 3 Age jicna bebeli bileig madein, “In uqa meen hatin biah cufa qoc eu olocdugeceb gesacna ligian?” ein. 4 Ge, meen eu ben bahic. Odocob age amaga teceb meen wele olocdogin gesacna len fein. 5 Odimeig age qalqal hatin dunuh lein. Ono dana haun oso eben meulana isec lotoc senenec tacen bibilen fein. Odimeig age filiciti cucuiein.

6 Uqa maaden, “Cain filiciti cucuiuwain. Age Jisas Nasaretdec na babalecna qocobil cal men eu walegina. Uqa ene qee bilel. Uqa wele ceseli cajeia! Feiga, cudun ina uqa mudecebil nijen. 7 Ageqa belimeig uqana malogom Pitaca maadeiga, ‘Jisas Galili ono aquniadi nuina. Uqa odi maadenwe age ono uqa foqagan,’ adeiga,” aden.

8 Odocob age qeleeli dadaneinnu age qalqal hatinnadec cali humeig busali belein. Odimeig age cucuieinnu oso je qee madoloin.

[Grik jaqec je hilah leihna age but i 16.9-20 eu qee nijel.]

Maria Makdaladec casac Jisas fen

(Matju 28.9-10; Jon 20.11-18)

[ 9 Cuha deelna qasil bahic Jisas ceseli cajimei uqa casac Maria Makdaladecca camas men. Jisas uqa wele buga me qee 7-pela Maria Makdalanadec ititacadeceb belein. 10 Maria uqa dana caja age Jisasca coboin eu ageca limei age qada qaqaji bibilegin je saaden. 11 Maria uqa ija Jisas figa uqa cebac bilia adeceb doin qa age uqana jenu wawaga qee meleel.

Malogom lecis ale Jisas jicna fesin

(Luk 24.13-35)

12 Eu hedocob Jisasna malogom lecis ale jic bahu euna bebelesin uqa deweg fecnu fil odi aleca camas men. 13 Odocob ale ceselimesi malogom leih maadesin qa age alena jenu wawaga qee meleel.

Jisas uqana malogom cabi aden

(Matju 28.16-20; Luk 24.36-49; Jon 20.19-23)

14 Eu cunug hedocob Jisas uqana malogom 11-pela age sab jejegin uqa ageca camas men. Odimei age dana cajaca uqa ceseli cajeceb fimeig maadecebil age agena jenu wawaga qee meleelnu uqa age wawaga qee meleeceb wawaga tool ibuldonnu galac maden. 15 Odimei uqa maaden, “Age mahamaha cunugna beladimeig dana cajaca cunug Anut ifanen eu me je qasali maadeiga. 16 Oso me je eunu waug meleeceb wa joudec ocobfi Anut cahahadugian. Euqa oso me je eunu waug qee meleecebfi Anut uqa geuldigian. 17 Dana cajaca wawaga meleigian saen euna kobolkobol odoc i edi caligian. Age ijanina buga me qee dana deweneganadec ititacadecebil beloqagan. Age beilamaga je haun filfil madoqagan. 18 Age man sononec me qee u hewoqagan. Age wa me qee oso jifeig age qee cal mowain. Age ebenega hag dana cajaca dewenegana mecebil age me moqagan,” aden.

Anut uqa Jisas ehudeceb sao ohis ten

(Luk 24.50-53; Apos 1.9-11)

19 Odocob Jisas Tibud uqana malogom gami je madi hedocobil Anut uqa Jisas ehudeceb sao ohis timei uqa Anut eben meulana isec bilen. 20 Odocob uqana malogom age beladi maha cunugnana me je qasali maadein. Age me je qasali maaadegin Tibud uqa ageca cabi ooig kobolkobol odoc eu agena me je madec gabalna calen euna agena je eu mele eunu ihacaden. Mele.]

[Grik jaqec je hilah leihna age but 16.9-20 eu qee nijel euqa je fil oso nijia eu odi:]

[(9) Caja eu age limeig Pitaca dana age uqaca bileinca je cunug maaden eu mahuc saadein.(10) Eu hedocob Jisas uqadodoc malogom suladeceb age maha cam tobi becna isec, cam toni nocna isec belimeig me je qasali maadein. Me je eu gun, eu Anut uqana dana cajaca cahahaadecnu je, eu qee qee meiaun, eu gaid biligian.]